《春嬌救志明》舊酒新瓶 平淡乏味

Horace Chan 4/28/2017 12:00:00 AM 影評

《春嬌救志明》拍到第三集,未睇前已經有個好大疑問,彭浩翔仲有乜嘢好講?多年來傳聞中發哥紅姑並未有參演出任志明父母,志明春嬌依舊未結婚。志明依然係果個長唔大嘅大細路,會用9萬5買舊『子宮』模型,鐘意玩surf wheel,春嬌依然係果個極想喺感情生活找尋安全感嘅『白毛女』。

今集最大嘅不同就係加入金像配角,飾演春嬌爸爸的秦沛,但我哋除咗睇到佢係一個好色老男人,但實在浪費呢位老戲骨,同類型角色秦沛喺《桃姐》嘅『㩒鐘仔』角色深刻得多。而同春嬌個場對手戲亦唯一一場秦沛有內心戲嘅發揮,亦遠遠不如佢喺《北京遇上西雅圖之不二情書》嘅演出。

至於大陸演員蔣夢婕飾演志明契媽,來港暫住在春嬌志明家,蔣夢婕所飾演喺外國返嚟『凸點』ABC,性格豪放,但同上集有36D「事業線」深不見底嘅楊冪同春嬌打對台爭志明,實在威脅力相差甚遠。而向春嬌志明所提出捐精請求亦實在搵戲嚟做。

今集都有唔少串星(例如:林海峰森美區凱惇)但不及上集串星出現所制做效果,例如鄭伊健王馨平黃曉明,連帶春嬌班密友好似Brenda林兆霞,或者粗口爛舌『腿將開』小姐,上集各自各精彩,但今集只令人覺得佢哋煩擾不堪(尤其是唔好攞Raidas首《傳說》咁攪法啦)。好難接受四十幾歲春嬌喺度唱小雙俠。以前細個放學好鍾意睇小雙俠,但真係唔駛搵春嬌懶cute唱俾大家睇。

可能今次錢多得滯,同上兩集開頭一樣,都會有一d同影片截然不同風格打頭陣,今次用咗一隻類似金剛哥斯拉怪獸角色「趷趷剛」,氣氛驚慄懸疑血腥,但之後另一場外星人出現對故事有咩貢獻?似係有場戲俾下彭浩翔玩玩CG而已。

其實講返上集《春嬌與志明》,無疑娛樂性豐富,但劇情其實不足以支撐整部戲,而尾後三分一春嬌志明應否再續前緣,拖拖拉拉更成為影片最弱一環。但今集繼續攞呢個point小題大做。平淡乏味感情生活拖拖拉拉去支撐兩個鐘,彭浩翔攞唔到新觀點新角度舊瓶新酒,繼續賣弄小聰明同有味對白。

網主 Horace Chan

你可能感興趣

即將上映