《廉政風雲 煙幕》麥兆輝失手之作

陳子斌 2/11/2019 12:00:00 AM 影評

關於廉政題材電影,過往黃百鳴炮製幾部字母風暴系列,請嚟曾於ICAC工作林德禄復出執導,雖然不算優異但林德禄勝在夠熟手,成績總算不過不失,而回歸過後,不斷出現高官犯案不受起訴,但礙於政治因素,ICAC角色形同虛設,究竟廉政題材還有多少吸引力同說服力?過往十幾部電影包括《無間道》及《竊聽風雲》系列通通都是合導,麥兆輝十八年後『單飛』執導成績又於何?(上次『單飛』執導已經係十八年前由現已消失娛樂圈多年陳冠希所主演《願望樹》)

故事講述香煙貿易集團賄賂海關一案,被告在開庭前突然棄保潛逃,重要証人許植堯〔張家輝飾〕亦神秘失蹤。廉政公署總調查主任陳敬慈〔劉青雲飾〕要在七天之內,翻查所有蛛絲馬跡;上級同時派出另一調查主任江雪兒〔林嘉欣飾〕,趕赴澳洲遊說許植堯回港出庭作證。要抽出私煙買賣的幕後黑手原來許植堯的神秘身份才是案情關鍵!

我個人覺得《廉政風雲 煙幕》係失望,首先我覺得呢部電影極度考驗觀眾耐性,唔怕老實講係睇得好辛苦,簡直就係度日如年感覺,我哋嘅身份係觀眾唔係ICAC職員,唔係喺ICAC開會唔使喺度聽D冗長對白重組案情,戲中出現好多解話式嘅對白,最好笑好多時留翻俾劉青雲再clarify對手講過嘅嘢:『即係XXX呀?』恐防觀眾睇到一舊雲。動作場面亦都唔太多,呢套戲都幾乎係等到差唔多臨完場20分鐘先有一個追車嘅場面,其實有無動作場面都唔重要,最重要個point of attack係乜嘢,即係要hook住觀眾嗰個位係邊度,前大半部分嘅篇幅係完全欠奉。

橫顧麥兆輝其實初出道嗰幾部戲例如《追兇20年》或者《週末狂熱》對呢種『999誰是兇手』最後邊一個係主謀劇種情有獨鍾,呢種講故事手法其實風險幾大,因為大部分嘅篇幅去鋪排,最後要靠個twist令觀眾感到驚訝,如果觀眾buy成套戲,正如上次莊文強《無雙》雖然都有少少畀人詬病,但未至於全炒,但今次麥兆輝直頭遭逢滑鐵盧!

故事結尾又要講下劉青雲同張家輝童年後生嘅往事,呢個結果其實未能令人感到滿意,尤其是個CG用所謂一種新嘅效果將一D年長嘅演員好似Ant-Man出現Michael Douglas用CG執到佢好後生嗰陣時個樣,今次劉青雲同張家輝就嘗試做番廿零歲嗰陣個樣但問題係做得非常非常之差尤其是面容扭曲,劉青雲同張家輝二人戴咗面具定整咗容??啲feature完全唔啱比例,睇相都已經唔過關更何況放CG點可以達標?

總括嚟講,《廉政風雲 煙幕》係麥兆輝嘅失手之作,比起黃百鳴炮製幾部字母風暴系列還要差得多!

Horace簡評《廉政風雲 煙幕》
https://www.youtube.com/watch?v=hfOp1JF_XQo

Site Owner 陳子斌

你可能感興趣

即將上映